PASG 2019 – Amy J. L. Baker
Þroskasálfræðingurinn Amy J. L. Baker útskýrir Fjögurra þátta líkanið, greiningarramma sem auðveldar fagfólki að greina á milli foreldraútilokunar og foreldrafráhvarfs. Baker segir einnig frá rannsókn sinni á áhrifum foreldraútilokunar á börn en þær hafa leitt í ljós að foreldraútilokun hefur djúpstæð áhrif á líf barna, sjálfsmynd þeirra, líðan, sambönd þeirra við aðra og samskiptahæfni.
Þá sé foreldraútilokun í raun ein tegund andlegs ofbeldis. Útsettir foreldrar upplifi sorg yfir að fá ekki að taka þátt í lífi barna sinna sem er í ætt við þá sorg sem foreldrar finna við andlát barna. Baker býður því upp á þjálfun fyrir útsetta foreldra, en hún felst að einu leyti í því að foreldrið breyti hegðun sinni og verði enn til staðar fyrir barnið þrátt fyrir lítil eða engin samskipti. Að öðru leyti felst hún í að foreldrið reyni að innræta barnið samúð, fyrirgefningu og heiðarleika í gegnum samskipti sín við það.
PASG 2019 – Ben Burgess
Með kúgandi hegðun á Ben Burgess sálfræðingur við hegðun sem við fyrstu sýn virðist rökrétt og gagnleg en þegar betur er að gáð hefur þann eina tilgang að rugla og refsa þeim sem fyrir henni verður. Mál tengd foreldraútilokun eru almennt flókin þar sem þau innihalda marga breytilega þætti sem erfitt getur verið að halda utan um en þegar annað foreldrið beitir kúgandi hegðun verða þau enn meira krefjandi.
Kúgandi hegðun getur á einn hátt birst þannig að útilokunarforeldrið nær fagaðila á sitt band og vélar hann til að hjálpa sér við að skerða umgengni útsetta foreldrisins við barnið. Á annan hátt getur hún birst í formi ásakana um líkamlegt og kynferðislegt ofbeldi gegn barninu af hendi útsetta foreldrisins þar sem blásið er upp hátterni sem talið var eðlilegt fyrir deilur foreldranna. Útsetta foreldrið er því alltaf í vörn gegn ásökunum sem tengjast kúgandi hegðun útilokunarforeldrisins.
PASG 2019 – William Bernet
Samkvæmt William Bernet, MD, er foreldraútilokun vandamál sem getur komið upp í kjölfar skilnaðar eða sambúðarslita þegar mikill ágreiningur er á milli foreldranna. Annað foreldrið byrjar að gagnrýna og tala illa um hitt og barnið lendir þar á milli. Það endar á að taka hlið annars foreldrisins, og hafna hinu án góðrar ástæðu.
Þá sé kominn tími á að Alþjóðaheilbrigðismálastofnunin viðurkenni foreldraútilokun og birti faglega skilgreiningu á heimasíðu sinni sem fagfólk getur notast við í starfi sínu. Það myndi hjálpa í baráttunni gegn foreldraútilokun, sem og ef fagfólk á borð við heilbrigðis- og ríkisstarfsmenn fengu meiri þjálfun í að bera kennsl á foreldraútilokun svo hægt sé að grípa fyrr inn í þau mál.
Einnig ætti fjölskyldumiðlun að vera í boði í kjölfar skilnaðar þar sem foreldrar fengju aðstoð með samskipti og væru látnir koma sér saman um fyrirkomulag umgengni á þá vegu að báðir muni taka þátt í uppeldi barnsins.
